الذكاء الاصطناعي والزراعة في مصر

المذيعة: رجعنا لكم مرة تانية مشاهدينا ولسه مكملين فقرتنا معاكم، وصلنا لفقرة هامة جداً. مفيش شك أن الزراعة هي أساس من أساسيات الاقتصاد المصري والأمن الغذائي، لكن الحقيقة أنها بتواجه العديد من التحديات الكبيرة زي ندرة المياه، وتغيرات المناخية، وزيادة الطلب على الغذاء؛ فكان لابد أننا ما نتوقفش فقط على الزراعة التقليدية، لكن لابد أن تدخل الزراعة الذكية، وده طبعا ليه دور كبير جداً في مواجهة ندرة المياه وما يحدث من تغيرات مناخية ومستقبل أفضل للزراعة. ده كله طبعا اللي هنعرفه من خلال ضيفنا العزيز المنورنا النهارده: المهندس عاصم حجازي، خبير الذكاء الاصطناعي. بنرحب بحضرتك معانا يا فندم.

المهندس عاصم: أهلاً بيك.

المذيعة: أهلاً بحضرتك يا بشمهندس، يعني أكيد من الموضوعات المهمة جداً لما نكون بنتكلم عن يعني الزراعة الذكية واستخدام الذكاء الاصطناعي في مجال الزراعة كمجال هام، ماذا عن الرؤية العامة لاستخدام الذكاء الاصطناعي في الزراعة بما أنها من المجالات الاقتصادية الهامة جداً في مصر؟

المهندس عاصم: أنا الحقيقة لما قالوا لي أنت هتعمل لقاء عشان مصر ومستقبل مصر، فأنا عملت يعني زي ما بتقولوا فكرة جديدة، اللي هو إنشاء مركز للذكاء الاصطناعي للزراعة، مخصص للزراعة. المركز ده أهم حاجة في الذكاء الاصطناعي هي البيانات. أنت بتدي له بيانات، هو بيديك نتائج كويس، ما اديتوش بيانات كويسة، ما يديكش نتائج المرجو. فالمركز ده المفروض أنا اللي بقترحه على الحكومة المصرية تنشئه، ولازم يكون البيانات اللي بيجمعها من جميع الجهات، مثلاً: الخبراء، الفلاحين، المزارعين، الدكاترة، وزارة الزراعة نفسها، الجامعات، الذكاء الاصطناعي اللي بيستخدم في الدرونز مثلاً، المسح الفضائي، كل ما أديتي بيانات من جهات مختلفة الذكاء الاصطناعي يديك حاجات لا يمكن تتوقعيها، وده اللي أنا الركيزة الأساسية اللي إحنا المفروض نركز عليها في الذكاء الاصطناعي: ننشيء مركز للذكاء الاصطناعي للزراعة، الأساس فيه هو جمع البيانات، وبعد كده أي ذكاء اصطناعي تركبيه هيشتغل كويس، إن شاء الله.

المذيعة: طب خلينا نتكلم إزاي أصلاً نوصل للمزارع البسيط فكرة الاستشارات الذكية؟ خاصة ممكن يكون أن هو مثلاً في بلد بعيدة شوية، فبكون النت فيها مش أكوا حاجة، إزاي إزاي بنقدر نتواصل معاه ونوصل له فكرة الزراعة الذكية، وال- طبعا إن الزراعة التقليدية ما بقتش كافية، إزاي بنوصل له الرسالة دي؟

المهندس عاصم: لو إحنا عملنا المركز ده -هو ده الأساس- يقدر المركز ده يجمع معلومات من المزارع ويقدر يديله معلومات. يعني دلوقتي مثلاً المزارع ممكن يصور بالكاميرا بتاعته، بالفيديو، بصور محاصيل زراعية أو المشاكل في المحاصيل الزراعية، ويبعتها للمركز. فتخيلي أنت ك- كمزارع في مصر ممكن يبعت للمركز، المركز ما فيهوش بقى إن بني آدمين واقفين ورا الكلام ده، لأ، الذكاء الاصطناعي ممكن يجمع ملايين البيول الفيدباك أو من- من المزارعين 24 ساعة في الـ 24 ساعة. بيبقى بيجمع بقى كل المعلومات دي، ويقول لكل مزارع على كل حتى محصول عنده أنت تعمل ايه في في الزراعة المعينة، أو في الأرض المعينة، أو السماد المعين، أو الدواء المعين، لدرجة أن الذكاء الاصطناعي ممكن لكل مزارع يخصص ليه فيدباك ليه أو مثلاً يقول له اعمل كذا عشان أنت عندك كذا وكذا، فما لكل مزارع في مصر ممكن يوصل الذكاء الاصطناعي للمرحلة دي. طبعا إحنا لو ما عندكيش مثلاً إنترنت أو الإنترنت ضعيف، ممكن بعد ما يخلص هو يجمع الحاجات دي يبعتها لما يكون عنده وسائل الإنترنت، أو نحط له أريال نقوي الإرسال في الأراضي دي. من الحاجات التانية ممكن تفيد المزارع أن إحنا ممكن حاجات نحط اللي هي الحاجات الذكية جوة الأرض، اللي هي بتقيس نسبة الملوحة، بتقيس مثلاً الجو والرطوبة والكلام ده، وحتى تبلغ المزارع، ممكن حتى المزارع يتفاعل مع الدرونز اللي هي بتطلع بسبب الذكاء الاصطناعي، مثلاً يكون في آفة طلعت، الدرونز دي ممكن تطلع أوتوماتيك بشكل تلقائي مع التنسيق مع المزارع، مع المركز ذكاء الاصطناعي ده، إحنا مش بس بالذكاء الاصطناعي، لأ، في خبراء، يعني المركز ده فيه ذكاء اصطناعي بالإضافة الخبراء، بيسموها بالإنجليزية Human in the Loop، فلازم يكون الناس الخبراء دول مع الذكاء الاصطناعي يفيدوا كل مزارعين في وجه مصر، أنت ممكن تبعت رسالة واحدة لكل مزارعين في مصر وقت واحد، وتأخد منهم آراء في في وقت واحد 24 ساعة للـ 24 ساعة.

المذيعة: جميل. طيب، معروف يا بشمهندس أن الزراعة بشكل عام بتستهلك قدر كبير جداً من الميه، حوالي 85% من الميه العذبة. إزاي ممكن نقدر من خلال الذكاء الاصطناعي والتكنولوجيا الحديثة أننا ندير استخدام الميه بشكل ما يبقاش فيه هدر للكميات الكبيرة؟

المهندس عاصم: جميل جداً، في دراسات فظيعة على موضوع حاجة اسمها Vertical Farms أو المزارع الأفقية، اللي يكون أنت عندك مثلاً فداني بـ 10 فدان، بيستخرج 30% من الميه المستخدّمة أصلاً، يعني مثلاً لو إحنا قلنا الفدان هيستخدم 100، هي بتاخد 30، والميه دي فيها معادن، الميه دي بتخش على الزرع، ما فيش طين، ما فيش طين، يعني أنت ممكن تأكل من من المزرعة دي بشكل مباشر. في دراسات على أنك تطلعي الميه من الهواء، واخدة بالك؟ وفي دراسات إحنا ما نعرفهاش دلوقتي، في دراسات أنك بتزرع في الميه المالحة؛ يعني أنت ممكن تدخلي ميه ميه البحر على الزراعة وتزرعي فيها. الذكاء الاصطناعي ده ممكن يجمع لك كل الدراسات دي، وكل الحاجات دي، ويشوف هل هي مناسبة للأرض المصرية أو لا؟ دي دي رقم واحد. رقم اثنين، أنت ممكن تعملي مسح على جميع الأراضي الزراعية وإزاي بتخش لها الميه، ميه الأبار، ميه النيل، الكلام ده كله، الذكاء الاصطناعي ممكن يوصل لدرجة يقول لي: خلي بالك أنت المحصول الفلاني في الأرض الفلانية بيستخدم ميه أكتر لو أنت زرعتيه من في الأرض الفلانية، صحيح. فزرعي مثلاً البرتقال في الأرض دي وزرعي في الأرض دي مثلاً بطاطس هتستخدم ميه أقل وهتستفيدي أنت ك- كاستهلاك للمياه، وممكن ينزل لك حتى يخفض استهلاك المياه بدرجات كبيرة يعني، وكل ما أديتي بيانات للمركز ده، وكل ما الخبراء هتتأفجي الذكاء الاصطناعي ممكن يديك اختراعات مش موجودة على الأرض. يعني أنت بقى تجمعي كل أبحاث اللي حصلت في العالم، مثلاً، أنت عارفة مشكلة المياه موجودة في كل مكان، لو كنت تجمعيها في مركز الذكاء الاصطناعي، مركز الذكاء الاصطناعي يطلع لك إيه حاجة خاصة بمصر، ومش بس خاصة بمصر، دي خاصة بأرض معينة، في حته معينة، ناقص فيها المياه معينة بشكل، حتى زي ما كنت بتكلموا شوية على مشكلة المناخ، الذكاء الاصطناعي ممكن يعمل لك حاجة اسمها Simulation؛ أنك بعد 10 سنين، بعد 15 سنة، أنت لازم تعملي واحد اتنين تلاتة؛ عشان المياه هتووصل معاكي للمشكلة دي. للاسف أنه حالياً الناس بتتجه للذكاء الاصطناعي قبل ما تجهز البيانات. طب أنت جهز البيانات، مش مشكلة الذكاء الاصطناعي، أنا ممكن أجيب أي ذكاء اصطناعي يتركب على البيانات، بس أهم حاجة تجمع البيانات دي على قدر الإمكان، تقدر توفر استهلاك للمياه بشكل طبيعي إن شاء الله.

المذيعة: طب لو اتكلمنا بقى عن الزراعة الدقيقة ومكافحة الآفات، إزاي هتقدر تفيدنا التكنولوجيا الحديثة في القضاء على الأمراض ومكافحة الآفات؟

المهندس عاصم: الذكاء الاصطناعي أنا كنت كتبت مقالة أن الذكاء الاصطناعي هيوصل يدي دوا مخصص لكل إنسان. بمعنى، أنت بتاخدي الأسبرين وأنا باخد الأسبرين، مش نفس الحاجة بتحصل لي لما أنا باخد الأسبرين، يمكن دخلت أنت حبتين تؤثر عليكي، أنا باخد حبة واحدة. الذكاء الاصطناعي هيوصل لأنه يعالج الآفات الزراعية بكل آفة لوحدها، يعني مثلاً عندك أنت مرض خاص للبرتقال، ومرض خاص للبطاطس، مثلاً. ويمكن حتى البرتقال يتزرع في أرض معينة يبقى ليه مرض معين تاني. أنا بدي فرصة للمزارع نفسه يصور المرض ده، أو البرتقالة حصل لها إيه والمشكلة حصل لها إيه، ياخدها للصنا- للذكاء الاصطناعي يحلل الفيديو أو الصور، و- حتى المزارع ممكن يعلم الذكاء الاصطناعي يقول له: خلي بالك لأن المزارع عنده خبرة كبيرة، فبيقول له: ده حصل كذا كذا كذا، يرجع الذكاء الاصطناعي يقول له: الآفة دي هتتعالج بالسماد بشكل معين، بالدواء المعين، يغير مكان الزراعة أو كذا، أو الحشرات المعينة ممكن تعمل مثلاً تحط لها دواء معين يقضي على الحشرة دي، فممكن يعالج المرض بدواء معين، تركيبة معينة، خاصة بالأرض المعينة في المكان المعين. الحلو بقى في الذكاء الاصطناعي يقول لك: بص، أنت مش لازم تطبق على الأرض كلها، خد مثلاً 10م × 10م، وطبق- وطبق اللي أنا قلت له عليه، اللي قلت لك عليه يعني، إذا مشي- مشي الكلام ده، يبقى طمّقه على- المزارع التانية، وممكن أحطه حتى ممكن وزارة الزراعة لو في آفة كبيرة ممكن نحط كاميرات، الكاميرات دي تراقب الزرع 24 ساعة في 24 ساعة، وتبعت بيانات للذكاء الاصطناعي، والذكاء الاصطناعي يحللها مع الخبراء حتى في الزراعة ويعالجوا الكلام ده.

المذيعة: طيب، معروف طبعاً يا بشمهندس أن المزارع بيبقى عنده خبرة كبيرة، إلى جانب الأبحاث الزراعية التقليدية اللي بتتم بالشكل التقليدي اللي بنقول عليها أبحاث زراعية قديمة؛ إزاي ممكن نقدر نجمع ما بين الخبرة وما بين البحث العلمي؟ نجمع ما بين الأبحاث القديمة والأبحاث الحديثة بحيث إنها تطلبق على أرض الواقع؟ عشان يكون في استفادة أكثر؟

المهندس عاصم: أولاً، الذكاء الاصطناعي مساعد للمزارع، يعني اعتبريه مزارع ذكي بيساعد كل المزارعين الموجودين في أي دولة، وخاصة مصر، ويتكلم بلغته كمان، ويتكلم باللهجة بتاعته، بيتكلم برُموز خاصة، ساعات المزارعين بيبقى لهم رموز خاصة بيتكلموا فيها، الذكاء الاصطناعي ممكن يراجع 7000 سنة حضارة في مصر، أنت ممكن تكتبي اللغة الفرعونية، الذكاء الاصطناعي يقرأ اللغة الفرعونية، ويقول: الزراعة كانت في مصر من كذا سنة كذا، ولو عندك أنت أبحاث قديمة تقدر تدخليها البيانات دي لدرجة أن هو ممكن يقول لك: "أه، أوكي، كان في 5000 سنة كانت مصر بتزرع كذا، وكان- طبعا ممكن يعمل إحصائيات حتى، الجو كان إزاي؟ بعد 2000 سنة من دلوقتي وبعد 100 سنة هيبقى، يعني هو بياخد الماضي، ممكن يبني عليه المستقبل ويقول لك: مصر هتبقى كذا كذا لو أنت عملت كذا". بس ده برده راجع: أنت بتدخل بيانات إزاي؟ أنت ما ينفعش تدخل أي بيانات، أنت عايز تدخل بيانات على الزراعة، تدخل البيانات على الزراعة، بالذكاء الاصطناعي القدرة بتاعته أنه حتى ممكن يقرأ اللغة الفرعونية، يكلمك فرعوني، ويكتبلهلغروفي، ويتكلم بأي لهجة المزارع بيتكلم فيها الذكاء الاصطناعي، فيمكن يجمع حتى الأبحاث مش بس مصر، أنا بأقترح أن مصر تشتري أبحاث من جميع دول العالم وتخدها وتدخلها على مركز الذكاء الاصطناعي عشان تقدر تطور الزراعة في مصر بشكل عام.

المذيعة: هناك طبعا تفكير لدى المزارع الصغير أن ممكن تكون فكرة استخدام الزراعة الذكية دي مكلفة؛ هل فعلا الزراعة الذكية مكلفة بالنسبة للمزارع الصغير؟ ولا بتحتاج هيئات كاملة عشان تطبق الزراعة الذكية أو أجهزة زي جهاز مستقبل مصر، طبعا اللي بيستخدم الزراعة الذكية في العديد من المشروعات اللي شفنا في الدلتا الجديدة وفي قطاع اللاهون وفي شرق العوينات وغيره من المشروعات العملاقة اللي بتنفذ على أرض مصر؟ هل المزارع بقى البسيط العادي يقدر يستخدم الزراعة الذكية؟ ولا هتبقى مكلفة بالنسبة له؟

المهندس عاصم: أولاً، في جانبين: الجانب أنه هو بيتكلم الذكاء الاصطناعي عن طريق الموبايل مش هتتكلف حاجة. يعني إحنا هنعمل تطبيق، تطبيق زي السوشيال ميديا يقدر يبعت للذكاء الاصطناعي والذكاء الاصطناعي يرد عليه. بعدين الشق التاني أن هي، هل هي هتكلّف الدولة؟ آه، هتكلّف الدولة، بس أنت عايزة ترجعي الاستثمار ده هيحرجع لك إمتى؟ يعني أقصى حاجة ثلاث سنين، وبعدين اقتصاد الدولة كله هيتحسن، في صرف، هصرف على مركز الذكاء الاصطناعي طبعاً، هتصرف على الذكاء، هتصرف على الأجهزة اللي هتوزعها، على الدرونز، على المسح الفضائي، على كذا، طبعاً هتصرف عليه، بس لو أنت فكرت أن مثلاً لو جمعنا البيانات دي مع ناس، ناس خبراء، وقعدوا يفكروا إزاي هنحل المشكلة؟ هتقعد معهم 15، 20 سنة، الذكاء الاصطناعي ممكن يحلها في أسابيع. نعم. فتستثمر، آه، بس ناس الخبراء بتوعك هيساعدوا، الذكاء الاصطناعي يحل مشكلة المفروض تحلها في 10 سنين، 15 سنة، يحلها في أسابيع، ويمكن حتى أيام. فهي دي، آه، هتصرف شوية، بس العائد الاستثماري مش هيكون المردود جيد؟ أكثر من الجيد، أكثر من، كل ما تغذيته ببيانات كويسة، كل ما استخدمت الذكاء الاصطناعي بشكل أحسن، كل ما كان المردود عليك لا يتوقع، محدش هيتوقعه بصراحة، حتى الناس اللي اخترعوا الذكاء الاصطناعي مش هيتوقعوا نتائج يعني.

المذيعة: طيب، هسال حضرتك تحديدا عن استخدام الذكاء الاصطناعي في مجال الزراعة ومردوده على السوق الزراعي، سواء المحلي أو السوق العالمي. ومَعروف طبعا أن مصر من الدول اللي- حاجاتها الزراعية تحتل مرتبة متقدمة على مستوى العالم، فماذا عن المردود فيما يخص طبعا الصادرات وأيضا السوق المحلي؟

المهندس عاصم: أنت في عندك حاجة إحنا ما ناخدش بالنا منها، ساعات بيكون عندك أنت أراضي في مصر تصلح للزراعة، وفي أراضي غير مستغلة بتبقى في اوقات كتير، وفي أراضي مستغلة بشكل خاطئ، يعني أنت بتزرع فيها محصول مثلاً العائد فيه مش قوي جداً، بينما العالم كله محتاج مثلاً محصول معين، زي مثلاً فرولة، لكن العالم مثلاً محتاج برتقال، مثلاً. الذكاء الاصطناعي ممكن يوجهك الكلام ده، وممكن يقول لك الأرض تزرع بالشكل الفلاني، في الحتة الفلانية في مصر، يمكن أصلاً حتة أصلاً أنت مش متخيل ممكن تزرع فيها، وبيقول لك ده هيساعد ص- مصر مثلاً ينمو 10 أو 15% في الزراعة، لأن العالم كله مثلاً ناقص المنتج ده، وأنت كمصر ممكن تنتج المنتج ده، فهيلعب دور أساسي جداً حتى في توجيه الدولة تزرع إيه، وتصدر إيه، وتستورد إيه. يعني ده- ده هيلعب دور كبير، أنت عارفة أهم حاجة الزراعة، وحتى يقول لك مثلاً الاكتفاء الذاتي بتاعك في المحصول مش مهم الاكتفاء الذاتي، لما أقول لك كده مش مهم الاكتفاء الذاتي؛ لأن أنت هتجيب عائد كبير، بدل ما تعمل الاكتفاء الذاتي بعد ثلاث سنين بمحصول واحد، هتعمل الاكتفاء الذاتي إيه؟ بـ 15 محصول، وأنت هيدي لك عائد كبير، تقدر تعمل اكتفاء ذاتي. فالمعادلات دي يقدر الذكاء الاصطناعي يساعد الخبراء في في- يعني باتخاذ القرار، وعلى فكرة زي ما قلت لك، أنت ممكن بعد 10 سنين تقول أنا عايز مصر تبقى عندها 30 مليار بعائد، مثلاً، يقول لك: لا، أنا هخليك في سنتين يبقى عندك 30 مليار. الكلام ده ممكن يحصل، بس أهم حاجة لازم البيانات الدخله على الذكاء الاصطناعي تبقى متوفرة.

المذيعة: طيب، إلى أي مدى يعني بدأ استخدام الزراعة الذكية في مصر في العديد من المحافظات المصرية والادوات بقى اللي بنستخدمها في الذكاء الاصطناعي في مجال الزراعة، يعني دلوقتي مثلا شفنا الدرونز، الطيارات اللي هي بدون طيار، شفنا، هل وصلنا لفكرة كمان أن زي الدول العالمية أن بقى في روبوتات ممكن تستخدم في الزراعة في الوقت الحالي؟ ولا لسه ينقصنا خطوة- الخطوة دي أننا نوصل لدي؟

المهندس عاصم: منقصنا حاليا، مع- ناقصك حاجة مهمة، المركزية. لو كل واحد هيشتغل لوحده، وهيعمل ذكاء اصطناعي لوحده، دروناتها لوحده، الدولة مش هتستستفيد، ليه؟ لأن انت ممكن تعمل، آه، زراعة أنت مقتنع أنه كويس، ومفيد للبلد، بس البلد ككل تقول لك: لأ، الكلام ده مش هيفيدني أكثر، ده هيفيدني لو عملت كذا. عشان كده لما يكون في مركزية في القرار تساعد الدولة كلها في الزراعة، حتى مع الشركات، حتى حتى ممكن أغير اتجاه الشركة، أقول للشركة: ازرع كذا عشان تعمل كذا، وهدي، هدي بيانات أساسية مش هخليه يشتغل على كده، فعلى فكرة، المركز ده على حد علمي مش موجود في أي حتى في الدولة، في أي دولة في العالم، لأن صعب تعملها. أما أن انت تعمل ذكاء في صناعة وتستخدمه في مصر، موجود، هكا، هتلاقي ناس كتير اللي هي بيستخدموا اللي هي ال- التقطير، مياه في التقطير، وممكن حتى ناس بدأوا في الفيرتيكال فارم وكذا، بس أنت كدولة هتستفيد إيه؟ لازم يكون مركزية في إخد البيانات دي كلها، وبصراحة، فرض على كل واحد يدي بيانات، عشان ده اقتصاد بلد وأمن بلد، لأن طبعا الأمن الغذائي ده أهم حاجة، تديرها، ساعتها هاقول لك: آه، مصر بتطبق ذكاء اصطناعي، بس كل واحد شغال وفاكر نفسه أنه مثلاً خلاص دي أحسن حاجة، وهو مش مطلع على الدولة، هيبقى في تقصير كبير في تطبيق الذكاء الاصطناعي، الذكاء الاصطناعي كل ما اديته، وقلت لك: بيانات على مستوى الدولة، أحسن من أن كل واحد إيه؟ يشتغل لوحده، أو كل ما الزراعة أو حتى كل محافظة تشتغل لوحدها.

المذيعة: طيب، هل في بعض التجارب العالمية أو الدولية لاستخدام الذكاء الاصطناعي في الزراعة، نقدر إحنا هنا في مصر نستفيد من هذه التجارب اللي ممكن تكون ناجحة، أو يعني في إشادة بها؟

المذيعة: حضرتك لازم ت- أي، أي حد في الذكاء الاصطناعي في، بص على الدول المنتجة، يعني أمريكا والصين هم أكتر ناس منتجين للذكاء الاصطناعي، وخلينا جادين أكتر، هي أمريكا. هتلاقي الدول اللي بتنتج الذكاء الاصطناعي بتطبقه، يعني بتطبقه في الزراعة وتطبيقه وكذا، لدرجة أن في ب- في شركة اسمها فريزون، هي أصلاً شركة اتصالات، نعم، بت- مزارع بيوصل له بالضبط الأسبوع الجاي أو أسبوعين، ثلاثة، أو أربعة، هيوصل مطر إزاي؟ فهو مش ما فيش داعي يسقي مثلاً الزرع خلال الفترة دي، لأن في مطر جاي، فيبعت له يقول له أنه في مطر جاي، فالجهاز بتاع اللي هو بيسقي الميه ما بيسقيش، واخد بالك؟ في، مطبق كذا، بس كمستوى حكومة مركزية مش موجود؛ لأنه صعب. نعم، يعني حتى الصين دلوقتي بدأت تزرعه تحت الميه البحر، برده باستخدام الذكاء الاصطناعي، بس هل في مركزية؟ الصين صعب قوي تعملي فيها مركزية، بس فيها مركزية أحسن بكثير من دول تاني. أنا رايي، لسه العالم، أنت خلي بالك الذكاء الاصطناعي لسه في أوله، يعني لسه أنت لسه في أوله، لسه في دول العالم لسه بتطبق، فأنا، أنا رايي مصر لو عملت مركز الذكاء الاصطناعي، الزراعة هتبقى أول دولة في العالم تعمل الكلام ده، لأن الذكاء الاصطناعي لسه في أوله، إحنا يعني حتى لو إحنا مركز الذكاء الاصطناعي هتلاقي مثلاً بعد السنتين الذكاء الاصطناعي يديك نتائج، وبعد خمس سنين يديك نتائج أحسن، أحسن بكثير، بس لو أنشأته من دلوقتي؛ لأن زي ما قلت لك، أهم حاجة البيانات، لو أنشأته من دلوقتي، أي ذكاء اصطناعي ممكن تطبقه بعدين، هيبقى مناسب في البلد، إن شاء الله.

المذيعة: طيب، خلينا نتكلم عن الفلاح المصري، وهل الفلاح المصري ممكن يشوف أن الذكاء الاصطناعي في فترة من الفترات ما نبقاش محتاجين للفلاح المصري بما أن كل حاجة هتعملها الأجهزة هيبقى فيه روبوتات، هيبقى فيه طيارات درونز بدون طيار؟ هل ممكن نستغني عن الفلاح المصري ولكن ولا الذكاء الاصطناعي لابد أنه يكون جنباً إلى جنب مع المزارع المصري؟

المذيعة: حضرتك قلتيها، جنباً إلى جنب، دي لازم، بس لازم الدولة تدخل. بمعنى، لو جه مثلاً جا شركة، قالت لك: يا عم، هنشيل الـ 20 مزارع وحط لنا إنسان آلي، الدولة تقول له: لأ؛ لأن دي ناس بتعيش من وراء الزراعة، وببتعيش- ده مصدر دخل أساسي ليها، طبعا. فالدولة توقف، تقول له: بقى الشركة دي ما تخشيش مصر، أو تخش في حته مثلاً صحراء، يعني لا يمكن مزارع يكون قاعد هناك حرارة مثلاً 50 على طول، فيصعب جداً أحط مزارع، فأجيب بقى إنسان آلي عشان ما يحص- ما يندرج المزارع، فهي هتبقى تنسيق الدولة، عشان كده بقول لك لازم يكون في مركزية، عدد المزارعين بيزرعوا إيه في كذا، طب أنا لو ضفت الذكاء الاصطناعي في الحتة دي، آه، ده هزيد الإنتاج، لو ضفت الذكاء الاصطناعي في الحتة دي، لأ ده أنا هأثر على المزارع وأخليه ما عندهوش شغل، فما تطبقهوش، الذكاء الاصطناعي بحر، بحر ضخم، يعني هأقول لك حاجة، ممكن تطبقيه مثلاً على منتج معين، منتج البرتقال، هطبقه فيه، بس منتج البطاطس مش عشان بيأثر على المزارعين، واخد بالك؟ على حسب أنت عايز تطبق فيني، يعني هنا مثلاً كنا بتتكلم على الذكاء الاصطناعي في العربية اللي بتتمشي بذكاء اصطناعي، اللي هي بدون سواقة، طب أنت لو دخلتها مصر، دي في مكان واحد شغال يعني العائد منه جاي من المواصلات التاكسي وغيره، فأقول لك: لأ، أنا مش هشتغل، بس ممكن أشغله بالليل خالص، أو ممكن أشغله في حتت مثلاً هي ومحدش بيراها، أقول لك خلاص يعني في مناطق النائية أو البعيدة، برافو عليك، فهي على حسب أنت عايز تطبق الذكاء الاصطناعي فين؟ الذكاء الاصطناعي لما يجي مع المزارع، أنا جاي أساعد زي ما حضرتك قلتِ، جاي أساعد المزارع لزيادة الإنتاجية، أريحه، مثلاً هو بيشتغل 8 ساعات وبقية الساعات، أقول له: يلا يا عم أنت اشتغل بقى لي ساعتين الباقيين، والدنيا بقت حارة، والمزارع مش عارف يطلع، يطلق الدرونز مثلاً بداله، على حسب أنت عايز تنسيق ده مهم جداً لازم مركزية، غير مركزية مش هتعرف توزع الذكاء الاصطناعي بشكل صحيح.

المذيعة: طب، هل في تحديات ممكن تعيق استخدام الذكاء الاصطناعي في مجال الزراعة تحديدا؟

المذيعة: هو مفيش تحديات، أنا ده رأيي. مفيش تحديات، التحدي الوحيد أنك لازم تتبنى تتبنى الذكاء الاصطناعي، الذكاء الاص- الفكرة ككل. الفكرة كلها، أنت كدولة تقول: لأ، أنا دلوقتي ميهمنيش الذكاء الاصطناعي، صراحة، يهمني اجمع معلومات، أجمع معلومات يسموها الكنولدج بيس (Knowledge base) أو المعرفة للذكاء الاصطناعي، ده أهم من الذكاء الاصطناعي نفسه، طالما أنا جمعت البيانات دي كلها، أطبق أي ذكاء اصطناعي، وخلي بالك الذكاء الاصطناعي ممكن يكون من شركة معينة، فتولي: لأ، أنا مش عايز الشركة دي تخش على البيانات بتاعتك كدولة، أو ممكن تخش على بيانات معينة، ما تخشش على بيانات معينة، أو ممكن أنت تعمل الذكاء الاصطناعي بتاعك، كدولة. بس كل ده مش هيفيدك لو مفيش بيانات، كل ده يعني، فعلا، فعلا، الذكاء الاصطناعي هيبقى زيرو، زيرو لو ما عنديش الداتا المطلوبة ومجمعة من كذا جهة، ما تجمتعش في حته واحدة، ما تجمتعش مثلاً المزارعين، آرائهم وكذا، وتولى: لأ، خلاص، لا، جمع كذا حاجة، الذكاء الاصطناعي هييديك النتيجة المرجوة، إن شاء الله.

المذيعة: طيب، تفتكر حضرتك أن الذكاء الاصطناعي في الفترة اللي جاي هيحقق عائد اقتصادي كبير جداً من حيث الإنتاج وجودة المحاصيل؟

المذيعة: طبعا، طبعا، ودي أنا أراهن عليها، الذكاء الاصطناعي لو دولة عملت المركز ده، لا تتخيلي أنا هقول لك حاجة غير بقى الزراعة، الذكاء الاصطناعي ده ممكن يعالج أمراض داخل الدولة، أمراض ناس؛ لأن إحنا لما بنكله، بيأثر علينا، في فترة الزراعة النظيفة. آه، لا مش بس كده، يقول لك: أنت بتكتر من السماد بشكل معين، بتحطه على البرتقال، ده بيعمل أمراض كذا، الأمراض دي بتكلفك كذا، واخد بالك؟ والناس مثلاً عندها فشل كلوي بسبب كذا، والناس دي عندها مثلاً روماتيزم بسبب كذا، فده يبقى في تكلفة على الدولة، كبيرة، فكرة العلاج بقى، بالضبط. فهو الذكاء في الزراعة ده ممكن يخش في حتة كتيرة أوي، يخش في الصحة، يخش في التمويل، يعني أنت أنت دلوقتي جت تمول أرض، بنك، أو تمول أقول لك: الأرض دي ما فيهاش ميه ومش هخش فيها بالذكاء الاصطناعي، يقول لك: لا، خمس سنين أنت هتتدفع 10 مليون، هيجيلك 100 مليون، فالذكاء الاصطناعي مش بس أن أنت كزراعة مش هيفيدك في أماكن تانية، أهم حاجة أنا رأيي الزراعة هيفيدك في الصحة؛ طالما أنت وفرت على الدولة أنها تعالج المواطن، أو تعالج الناس وتخليهم بصحة أحسن، طالما أنت وفرت فلوس بشكل غير مباشر للزراعة، بس أنت، والجزء الثالث الثاني المواشي، ما المواشي دي بتاكل من المياه دي وكذا، واحنا بناكل بنتاكل المواشي، طبعا، والمواشي دي هل هي صحية؟ هل البط والارنب والكلام ده اللي بتاخد، هل دي بتأثر بالأرض؟ طبعا بتأثر بالأرض، بتأثر بالسماد، بتأثر بنوع الميه، وتأثر بالكلام ده كله، طب ما أنت برضه هتعالج مشكلة المواشي، ما يكون عندك مثلاً مليون رأس يبقى عندك 10 مليون رأس، فالزراعة دي بتخدم الدولة في كذا في كذا مجال، لا تتخيلوه يعني، عن حتى أنا ما أقدرش أقولها الذكاء الاصطناعي ممكن يقول لك: لأ، أنا هفيدك في كذا وهفيدك في كذا وكذا، إن شاء الله.

المذيعة: طيب، فكرة استخدام الذكاء الاصطناعي لتوفير بقى الوقت والجهد، وخصوصاً أننا دلوقتي طبعا في توجه للدولة المصرية أن يكون في توسع أفق وراسي في المساحات المزروعة على كافه محافظات مصر، فماذا عن توفير وقت وجهد كبير جداً إذا فعلاً تم استخدام الذكاء الاصطناعي بالشكل المطلوب؟

المذيعة: الذكاء الذكاء الاصطناعي عنده حاجة حلوة أوي، توقع، يعني كل ما أديت له بيانات يقول لك: بصي، 10 سنين زرعت الأرض دي هتثبور، وهتخسر كل اللي أنت عندك، روح في الأرض الفلانية في المكان الفلاني، وحط الميه الفلانية بالسماد الفلاني كده، هتقول له: دي صحراء، راجل أنت بتتكلم في، هقول له: لأ، أنا بقول لك عشان التغير المناخي هيحصل كذا كذا كذا، الأرض دي هتبقى زراعية، تخيلي، والأرض اللي أنت زارعها كويس كده هتبدأ تتقلس، واخدة بالك؟ وهتبدوا فيها مشكلة. مثلاً، يقول لك: أنت عندك طحالب كبيرة في البحر الأحمر مثلاً، البحر الأحمر دي ممكن تستخدم الطحالب دي غذاء للمواشي عندك، أنت لا يمكن تتوقع الكلام ده، بس هو عشان أنت دخلت له بيانات من هنا ومن هنا ومن هنا، هيستصلح لك أراضي أو هتطلع، هيخلُق لك أراضي أنت لا يمكن تتخيلها، ممكن نقول: فيرتيكال فارمز، على فكرة، كان في دراسة في ألمانيا قالت أنه مش عارف سنة 2035 ولا كذا، كل واحد هيبقى عنده ثلاجة فيها الفيرتيكال فارم ده، ياكل منها، يعني أنت تاخد طماطم وخيار عندك كده زارعة في الثلاجة وتاخدها منك، أنا بتكلم جد، ومفيش طين، مفيش حاجة، الميه نفسها اللي بتدخلها ممكن تشربها، فده ممكن الذكاء الاصطناعي يقول لك: أوكي، طب أنا في مناطق نائية، أنا ما أقدرش أوصل لها، بلاش أنا أزرع، أجيب الفيرتيكال فارمز دي وأحطها، آه، هتكلف مبدئياً كذا، بس بعد 10 سنين كل الناس هتبدا تاكل وتشرب بدون ما يحتاجوا أصلاً، ياخذوا من- من المراكز الأرصية، أو مثلاً حتى يتصلوا بالنيل، واخدة بالك؟ إل- أنت شفتي التداخل فظيع إزاي جوه الذكاء الاصطناعي، بس أنا بقول لك بعض الحاجات، بعض الحاجات، فانت ممكن تقول: أنا عندي أراضي زراعية مثلاً مليون فدان، خلاص، بيقول لك: لأ، أنت ناسي البحر، البحر فيه مليون فدان زايد، هو البحر مين يا عم؟ أقول لك: آه، الطحالب ممكن تعمل كذا كذا كذا، ومش عارف إيه، ويديك بيانات، يديك بيانات ويديك أبحاث عالمية، هو مش هياخد بس، يقول لك أبحاث عالمية حصل كذا كذا، وممكن يخترع لك حاجة زيادة بناء على البحث ده، وبناء على البحث ده، وبناء على البحث ده، وبناء على الناس اللي قالت كذا، أنا بقول لك: اعمل كذا، وتعمل حاجة جديدة خالص مش موجودة في العالم، الذكاء الاصطناعي ممكن يوصل لك الكلام ده كله.

المذيعة: هل بدأت مصر في الفترة الأخيرة أن يبقى في ما بينها وما بين العديد من الدول شراكات في هذا المجال؟

المذيعة: ما سمعتش، ما سمعتش لسه، لسه ما وصلنهاش، أه لسه، بس أنا لو- لو عايزين نسمع إحنا وأنت رأي، لو عايز تسمع، تسمع من وزارة الزراعة، لازم وزارة الزراعة، ممكن تبعت تقول الناس لو أنت عندك أبحاث وكده، تعالي متخصص في المجال ده، متخصص تعالى عندك، بس مفيش، أنا رأيي، مفيش حد يروح على أرض زراعية في مصر، ولا حتى على الشركات، إلا عن طريق وزارة الزراعة عشان تعمل مركزية في القرار، وتساعدك أنت، يعني أنا مش- أنا مش بقول لك تعالى عندي علشان، لا، أنا بساعدك، أقول لك: لأ، خلي بالك الأرض بتاعتك دي ممكن ما تصلحش، را- أنت فاكر كشركة حاطط مثلاً 20، 50 سنة هطلع زرع من الأرض دي، الذكاء الاصطناعي يقول لك: لأ، هطلع 10 سنين، فأنا هفيدك، بس أنا هفيدك إزاي؟ لما أجمع المعلومات دي كدولة، ممكن الدولة تقول له: طب بص، أنا هاديك بدل الأرض دي، أرض تانية، خدها، وهو عارف العائد الاستثماري هيطلع كام، وبالتجربة، يعني أقول له: جرب على حتة أرض صغيرة اللي باقول لك عليه، وأعمله، ف- أنا وخلي بالك أن الذكاء الاصطناعي لسه في أوله، لسه في أوله، يعني أنت بعد 5 سنين هتلاقي الحاجات دي بقت مشيت وبقت طبيعية، حالياً بقول لك، عليكم، ده بالنسبة لنا يعني علم فضاء، بس بعد 5 سنين هيبقى سهل قوي، كل الدول بقت- طب هنا أسالك، بما أننا لسه في البداية في استخدام الذكاء الاصطناعي، ولا زال البعض ما عندوش برضو يا بشمهندس الثقة التامة في المعلومات أو البيانات اللي بنخدها من الذكاء الاصطناعي، حضرتك تقول ايه النهارده لكل حد أو أي حد بيستخدم الذكاء الاصطناعي تحديدا في مجال الزراعة؟ هل فعلاً اللي البيانات اللي بيتم الحصول عليها هي بيانات مأخوذة من أبحاث وتجارب معتمدة ومتعارف عليها، فيبقى المعلومات دي مأخوذة بشكل فيه نوع من الثقة فيها، ولا برضو يكون أفضل أن يتم استشارة شخص ممكن يكون متخصّص؟

المذيعة: الهيومان إن ذا لوب (Human in the loop) اللي هي مصطلح في الذكاء الاصطناعي أن لابد يكون الإنسان دايماً مع الذكاء الاصطناعي راجع وراه، وحتى لو كنا التطورنا بعد 5 سنين، لازم يكون، يعني، أنت بتاخد ذكاء الإنسان مع الذكاء الاصطناعي، عشان كده بقول لك المركز اللي بقول لك عليه لازم يكون في خبراء دكاترة، لا يستغنى عنهم أبداً. دي رقم واحد. رقم 2، في حاجة مهمة جداً: الذكاء الاصطناعي بيطور الذكاء الاصطناعي، يعني الذكاء الاصطناعي اهو بيطور، الذكاء الاصطناعي نفسه بيطوره، فأنت مثلاً عندك الزراعة، نفترض، أنا هأقول لك أنت جبت الكلام ده منين؟ جبته من تشات جي بي تي (ChatGPT) مثلاً، تشات جي بي تي جمع معلومات من كل حته، بيسموه الجنيريك انفورميشن (Generic information). أنت مش عارف مصادر تشات جي بي تي جابها منين، صح؟ أو حتى غيره جميناي (Gemini) والكلام ده كله، فعندك حق تشككي في: "أنا والله معلوماتك دي صح ولا غلط". بينما لما قلت لك، المركز اللي بقول لك عليه ده، المركز ده لا، أنت هتقجمع معلومات خاصة بالزراعة موثوقة، مراجعة من مين؟ من الخبراء، فالخبير دوره مهم جداً، المراجع، آه، لا البيانات دي صح، حتى المزارع لما يبعت، مثلاً قلت لك صورة ولا حاجة على آفة اجتماعية، الخبير أو المهندس الزراعي يراجع: "أه دي آفة كذا ودي آفة كذا، ممكن المزارع يكون غلطان، فلازم أرجع وراه، لو راجعت المعلومات بناس خبراء مع أن الذكاء الاصطناعي يدخلهم المعلومات الصح، هيطلع لك حاجة صح؛ لأن أنت زي ما قلتِ حضرتك، أنت واثقة في المصدر، لو أنتِ مش واثقة في المصدر، أه، هيطلع، أنا ممكن يطلع لك حاجات مغلوطة، جداً.

المذيعة: طيب، كيف ترى دور الجامعات والمعاهد البحثية في مجال بقى الزراعة الذكية؟ خصوصاً بقى دلوقتي في جامعات أصلاً خاصة بالذكاء الاصطناعي.

المذيعة: آه، أنا رأيي لسه الجامعات مقصرة في إدخال الذكاء الاصطناعي، يعني بيخاف أن الطالب يعتمد على الذكاء الاصطناعي، ويسيب الدراسة، بينما الذكاء الاصطناعي ممكن يقوي الدراسة، بمعنى: أنا دلوقتي بدرس البرتقال، أو الأمراض اللي في البرتقال والكلام ده كله، وأقول لك: يا عم ماليش دعوة بالذكاء الاصطناعي، خد من الكتاب، طب ما هو الذكاء الاصطناعي ممكن يعمل لك إيه؟ في مفهوم نفسه أنت مش فاهمه، يعني في مثلاً مركب دواء أنت مش فاهمه، الذكاء الاصطناعي ممكن يبسط لك فهم الدواء ده، فدي واحدة من الحاجات، وممكن الذكاء الاصطناعي يمتحنك في في المعلومات بتاعتك، يطبع لك معلومات تانية، يعني أنت مثلاً المنهج بتاعك في حته معينة، ممكن يجيب لك حاجات من من بره، الذكاء الاصطناعي يمتحنك فيها، فما تخافش في تطبيق الذكاء الاصطناعي، ماتتاخرش في تطبيق الذكاء الاصطناعي، بس طبقه بحيث يفيدك، فمراكز الجامعات والكليات وكده، لازم تطبق الذكاء الاصطناعي بحيث انمي أنمي قدرات الناس اللي بتعمل أبحاث، أساعده يعمل بحث أبعد، بدل ما يعمل بحث مثلاً في، مثلاً في 10 شهور، ممكن يخلصه في شهر، أهم حاجة أن أنت فاهم، أنت فاهم، فالذكاء الاصطناعي ممكن لو المفهوم نفسه صعب بالنسبة لك، يقول لك: لا، بيبسطوه بأبسط الأمور بحيث أن الموضوع، يعني يدخل في دماغك بطريقة معينة، أو بطريقة أنت بتفهمها، وتزيد بقى المعلومات، يقول لك: بدل ما اعمل بحث، ما اعمل بحثين، تلاتة، أربعة، واخد بالك؟ لأن الذكاء الاصطناعي ممكن يساعدك، فالجامعات أنا رأيي مقصرة في موضوع إدخال الذكاء الاصطناعي؛ لأن خايف منه، خايف الذكاء الاصطناعي عشان إيه؟ يخلي الطلبة بليدين وكذا، لأ، أنت ممكن تخلي الطلبة أذكى منه بكثير بسبب الذكاء الاصطناعي، دخلوه إزاي؟ دخلوه صح، مش بس يلا، طب زي ما قلت لك، المركزية برضو ارجع للمركزية، أن حتى وزارة الزراعة تتعامل مع الجامعات، إزاي تستخدم الذكاء الاصطناعي عشان اطلع كوادر وطنية، تقدر هي جاهزة أوريدي بالذكاء الاصطناعي، وجاهزة بالـ، يعني التفكير، تخش مع المركز دَه تساعد البلد نفسها تطلع، يعني.

المذيعة: طيب، التصنيع الزراعي جزء برده من مجال الزراعة ومجال مهم دلوقت وبقى في اعتماد عليه برده من الناحية الاقتصادية فيما يخص الصادرات المصرية وهكذا، استخدام الذكاء الاصطناعي في التصنيع الزراعي، حضرتك شايف قد ايه ممكن يبقى ليه دور مهم جداً في هذا الجانب؟

المذيعة: وهو برده، هارجع للمركزية، بس أهم من كده، أنا رأيي في التصنيع الزراعي دي حاجة مهمة قوي، أنه، بيسموها بالإنجليزية بروتوتايب (Prototype) اللي هو التجربة، لأنه أنت عشان تطلع تصنيع من كذا، ساعات بتخسر، يعني أنت ساعات بتطلع منتجات كتير وبتخسر، مرة واحدة تطلع كده، لا قدر الله، في حرب في بلد معينة، المحصول بتاعك يققف في الميناء، صح؟ مش بيحصل الكلام ده كله، أو بتخسر، يعني هو الثلاجات معينة بتخسر، الذكاء الاصطناعي ممكن يقول لك: المراحل من ألاف للياء، أول ما توصل البلد، يقول لك: خلي بالك، أنا بتوقع بالدرجة دي، هتحصل حرب معينة، أو هتحصل مشكلة معينة، وقف التصنيع الزراعي في الحتة المعينة؛ لأن أنت مش هتعرف تصدره. وعلى فكرة، دايماً في في أي بلد لما يجي يصدر بيحصل له مشاكل، يعني مش دايماً هو زي ما متوقع بيحصل، الذكاء الاصطناعي ممكن يقول له: وقف الكلام ده، أو صدر البلد الفلانية في الحتة الفلانية، مثلاً في جنوب أمريكا أنت ما تتوقعهاش، بدل ما تصدر لكذا لأن مش هتعرف تصدر المنطقة دي فيها مشاكل. فده هيساعد كتير للبلد في في التصدير والتصنيع الزراعي إن شاء الله، نعم.

المذيعة: طيب، بنتمنا بشمهندس، يعني أن يكون كده كل السادة المشاهدين استفادوا معانا بحلقتنا النهارده والفقرة دي لأنها من الفقرات المهمة دايماً لما بنتكلم عن حاجة خاصة بالتكنولوجيا وتطور التكنولوجي، وتحديداً الذكاء الاصطناعي من أكثر الفقرات اللي بتكون مهمة، وبنشكر حضرتك جزيل الشكر على وجودك النهارده، وعلى المعلومات القيمة اللي حضرتك قدمتها لنا، وإن شاء الله المشاهدين استفادوا بإذن الله، شكراً ليفتم، شكراً لحضرتك، مهندس عاصم حجازي، خبير الذكاء الاصطناعي. مشاهدينا، فاصل سريع وبعد الفاصل نلتقي مع حضراتكم من جديد وفقرة حوارية جديدة إن شاء الله.